CAP. XIX. Quod omnes in eadem statura resurgent quam in perfecta vel juvenili aetate scilicet habuerunt vel habituri fuerunt.

Illud quod ait Apostolus: Praedestinatos conformes fieri imaginis Filii Dei (Rom. VIII), potest sic accipi, ut quemadmodum nobis ille mortalitate, ita nos illi efficiamur immortalitate conformes. Si autem in his verbis qua forma resurrectura sint corpora sumus admoniti, sicut illa mensura, ita et ista conformatio non quantitatis intelligenda est, sed aetatis. Resurgent itaque omnes tam magni corpore quam vel erant vel futuri erant juvenili aetate. Si quis vero in eo corporis modo in quo defunctus est, resurrecturum unumquemque contendit, non est cum illo laboriosa contradictione pugnandum.