|
Cum valde occulta sint divina judicia cur in hac vita nonnunquam bonis
male sit, et malis bene, tunc occultiora sunt cum et bonis hic bene est,
et malis male. Nam cum bonis male est, et malis bene, hoc fortasse
deprehenditur quod et boni si qua deliquerunt hic recipiunt, ut ab
aeterna plenius damnatione liberentur; et mali bona quae pro hac vita
faciunt hic inveniunt, ut ad sola in posterum tormenta pertrahantur.
Unde et ardenti diviti in inferno dicitur. Memento, fili, quia accepisti
bona in vita tua, et Lazarus similiter mala (Luc. XVI). At cum bonis hic
bene est, et malis male, incertum valde fit utrum bona idcirco boni
accipiant, ut provocati ad aliquid melius crescant, an justo judicio
atque latenti hic suorum operum remunerationem percipiant, ut a praemiis
vitae sequentis inanescant. Et utrum malos idcirco adversa feriant, et
ut ab aeternis suppliciis defendant, an hic eorum poena incipiat, ut
quandoque complenda ad ultima gehennae tormenta perducat.
|
|
