|
Quaeruntur autem plurima de primo statu hominis ante peccatum, qualis
fuit homo priusquam peccaret, et qualis futurus fuisset si non peccasset
et in corpore et in anima, mortalis an immortalis; passibilis an
impassibilis. De termino inferioris vitae, et de transitu ad superiorem;
de qualitate et modo vivendi, et de propagatione filiorum, de vita et de
meritis nascentium ab ipso, et sequentium post ipsum, et multa alia
quae, licet aliquando cum curiositate quaeruntur, utiliter tamen
sciuntur, si cum discretione discutiantur. Nos vero in tam multis
praecipue quae a nostra intelligentia et capacitate remota sunt,
responsionem nostram moderari oportet, et ab iis quae dubia non sunt, ea
quae probabiliter dicuntur tantum distinguere. Ita periculum diligentis
inquisitionis nullum erit, si praesumptio temerariae assertionis non
fuerit.
|
|
