|
Plantaverat autem Dominus Deus, sicut dicit Scriptura, paradisum
voluptatis a principio in quo posuit hominem quem formaverat (Gen. II).
Qualis autem paradisus fuerit ubi homo probandus et exercendus positus
est, subsequitur Scriptura et dicit: Produxitque Dominus de humo omne
lignum pulchrum visu, et ad vescendum suave: lignum etiam vitae in medio
paradisi lignumque scientiae boni et mali. Et fluvius egrediebatur de
loco voluptatis ad irrigandum paradisum, qui inde dividitur in quatuor
capita (Gen. II). Patet ergo quantae amoenitatis locus ille fuit in quo
natura hominis adhuc a corruptione aliena foveri ac nutriri debuit, qui
fontibus et fluminibus irriguis, arboribus omnis generis frondosus et
nemorosus, fructu tam pulchro ad videndum quam suavi ad vescendum
refertus praedicatur.
|
|
