CAP. VIII. De aequalitate Patris et Filii et Spiritus sancti.

Supradictis adjiciendum, quod licet Filius de Patre, non tamen posterior Patre, vel inferior putandus est, sed coaeternus, coomnipotens, consubstantialis, coaequalis Patri Filius Patri et Filio Spiritus sanctus. Augustinus in libro De Trinitate: Sic coaeternus est Patri Filius, sicut splendor coaevus est igni, et esset aeternus si ignis esset aeternus. Et est notandum quod Filius aequalis est Patri secundum substantiam, non secundum proprietatem qua distinguitur a Patre. In eo enim quod Filius est unus Deus cum Patre, una natura, una substantia, aequalis est Patri; sed secundum quod de Patre est genitus, non est aequalis ei. Ergo inaequalis? non est verum; quia secundum hoc quod Pater est ingenitus, Filius genitus; nec aequalitas nec inaequalitas consideratur. Idem et de Spiritu sancto. Augustinus in quinto libro De Trinitate: Quia vero Filius relative ad Patrem dicitur, non secundum quod ad Patrem dicitur aequalis est Patri Filius, sed secundum quod ad se dicitur, aequalis est Patri Filius. Quidquid autem ad se dicitur, secundum substantiam dicitur: restat ergo ut secundum substantiam aequalis sit Patri. Eadem ergo utriusque substantia. Hujus sanctae Trinitatis non debet dici pars, una de tribus personis. Tota etenim Trinitas est una substantia, simplex et individua. Nec sunt aliquid majus duae personae quam una, vel tres quam duae. Cum enim unaquaeque illarum sit divina substantia et illae tres eadem substantia; non tres sunt majus aliquid quam una. Augustinus: In Trinitate, quae Deus est: Pater est Deus, Filius Deus, Spiritus sanctus Deus; et hi tres unus Deus. Nec hujus Trinitatis tertia pars unus Deus est; nec major pars est duo quam unus, nec majus aliquid sunt omnes quam singulae personae; quia spiritualis non corporalis est magnitudo. Idem: Non quoniam Deus Trinitas est, ideo triplex putandus est Deus: alioquin minor esset in singulis quam in tribus pariter.