|
Formam hujus sacramenti tradidit Christus cum dixit: Ite, docete,
baptizantes eos in nomine Patris, et Filii, et Spiritus sancti (Matth.
XXVIII). Et in ista forma debet tradi sacramentum. Legitur tamen in
Actibus apostolorum baptizasse apostolos in nomine Christi (Act. XIX);
in quo, sicut dicit Ambrosius, tota Trinitas intelligitur. In hoc enim
nomine intelligitur qui unctus est, scilicet Filius, et a quo unctus
est, scilicet Pater, et per quem, scilicet Spiritus sanctus. Ambrosius
in libro De Spiritu sancto: Cum enim dicitur in nomine Domini nostri
Jesu Christi, per unitatem nominis impletum est mysterium; nec a Christi
baptismate Spiritus separatur. Si enim Christum dicas, et Deum Patrem a
quo unctus est Filius, et ipsum qui unctus est Filium, et Spiritum quo
unctus est designasti. Scriptum est enim: Hunc Jesum a Nazareth quem
unxit Spiritu sancto Deus (ibid.). Hinc volunt habere quidam quod si
aliquis baptizetur in nomine Patris tantum, vel in nomine Filii tantum
(si non intelligit errorem inducere) baptizatus sit, nec debeat
rebaptizari. Quod nobis auctoritate non est certum, sed ex illa
auctoritate Ambrosii per simile volunt et hoc dicere.
|
|
