QUAEST. XIII.

Quaero ergo an Christus et Enoch sint homines? Si Christus non est homo eadem significatione qua aliquis ex nobis, quomodo frater noster est? Petrus homo erat, non hominem habebat. Christus homo erat, id est hominem habebat, ut isti exponunt. Nunquid igitur licet pluraliter inferre: Ergo Christus et Petrus homines erant? Item: Nonne passibilis et mortalis erat sicut unus ex nobis? Si ergo passibile potest nobis et illi in eadem significatione convenire, quare non homo? Quare potius concedimus accidentia nobis et illi esse communia, et non esse hominem? Nunquid convenit nobiscum in accidentalibus, et non in substantialibus? Augustinus dicit quod habitus est hominis susceptio quasi vestis quae non mutat quod vestitur. In quo verbo multi gloriantur. Non ait tamen Augustinus quod homo susceptus est vestis verbi assumentis, sed quasi. Et in quo consistat similitudo ostendit dicens quod non mutat quod vestitur. Quibus verbis nihil aliud vult ostendere, nisi hoc quod in susceptione hominis non est mutatum vel conversum in aliud Verbum Dei. Deus enim factus est homo, ut dicit Scriptura, non conversione divinitatis in carne, sed assumptione. Non ergo qui inventus est ut alius homo caruit veritate humanae naturae. Nunquid vestis aliqua sic unitur homini, ut vestis appellatio transeat in vestitum, ut homo dicatur vestis, vel ejusdem naturae cujus vestis? Sicut Deus est homo et ejusdem naturae cum homine?