QUAEST. II.

Quaero item quomodo Augustinus dicat susceptum hominem ad habendam naturaliter personam Sapientiae Patris, cum alibi dicat quod in unitate personae assumptus homo ille gratiae est non naturae? Solutio. Naturale duobus modis dicitur; et quod est de substantia rei, et quod est originale, id est ab origine creationis suae datum. Unde quia homo assumptus ex quo fuit, persona divina fuit, non tamen per naturam, sed per gratiam; quodammodo naturale est ei esse personam Dei, sed hoc naturale non excludit gratiam. Unde Augustinus in Euchiridio: In naturae humanae susceptione facta est quodam modo ipsa gratia illi homini naturalis. Nam ex quo homo esse coepit, non aliud esse coepit quam filius, et hic unicus, ut quemadmodum una est persona, anima rationalis et caro; ita una persona Deus et homo. Filius tribus modis dicitur, adoptione, ut nos per fidem; susceptione ut mediator, scilicet homo assumptus; natura ut Verbum, quod eadem substantia est cum Patre, non persona: et eadem persona cum Mediatore non substantia. Unde Augustinus in libro De Trinitate: Cum filius sit Deus et homo, alia tamen substantia Deus, alia substantia homo.