QUAEST. VIII.

Quaero a te qui negas aliquid quod est assumptum esse Filium Dei, quid dicas esse semen Abrahae? illudne, ad cujus adventum praedicat Apostolus legis statum, dicens quod lex disposita est in manu Mediatoris, donec veniret semen cui promissum est? (Galat. III.) Nunquid semen Abrahae dices quod non est ex Abraham? Deus Pater non nisi id quod ipse est genuit, id est Deus Deum. Quid ergo genuit Abraham homo, nisi id quod est homo, suae naturae prolem? Quod semen venturum erat, quando promissio facta est Abrahae. Hoc ergo semen quid est, si id quod est assumptum, homo non est. Nunquid homo non hominem genuit?