|
Ad hanc igitur fidem resurrectionis confitendam, in symbolo
apostolorum positum est: carnis resurrectionem. Nec sine ratione
additum est, carnis: quia fuerunt quidam etiam tempore apostolorum,
qui carnis resurrectionem negabant, solam spiritualem resurrectionem
confitentes, per quam homo a morte peccati resurget: unde apostolus,
II ad Timoth. II, dicit de quibusdam, qui a veritate
exciderunt, dicentes resurrectionem iam factam, et subverterunt
quorumdam fidem, ad quorum removendum errorem, ut resurrectio futura
crederetur, dicitur in symbolo patrum: exspecto resurrectionem
mortuorum.
|
|
