|
Et post pauca: diuus predicator beatus Iohannes ait: uos unctionem
quam accepistis ab eo in uobis manet, et non necesse habetis ut aliquis
doceat uos de omnibus. In Isaia scriptum est: spiritus domini super
me et cetera. Paulus dicit: in quo credentes signati estis et
cetera. Si autem creatus signatur et ungitur et de omnibus edocetur,
equidem spiritus sanctus est unctio et sigillum impressiuum imaginis in
se habite, in quo spiritu uere tamquam in suo sigillo, id est imagine
sue nature, consignat et caracterizat inprimendo ipsam suam imaginem
Deus uerbum sue beate Ecclesie et immaculate sponse, sibi ipsam
conformans deiformem facit, ex quo eidem Deus homo factus
coessentialis in humana natura, media beata deifusiua existente anima
rationali, et homoformis (fieri) dignatus est. Nam impossibile erat
sibi unire Ecclesiam non conformem nec deiformem, sicut impossibile
erat secundum predeterminationem diuine rationis ut eadem Ecclesia
Deum inuisibilem formam et incorpoream immediate nudam reciperet; sed
quemadmodum se consubstantiauit Deus eidem Ecclesie formam eius in se
assumens, ita ipsam eandem sua imagine naturali, spiritu uidelicet
sancto de sua usia naturaliter existente, deifice et superhabunde
insigniuit consignando et sibi deiformem (faciendo). Quoniam quidem
et hoc idem sacramentum deificum in plasmatione primorum parentum
diuinitus prefiniuit, cum Euam Ade copulauit et Adam eandem precepit
sibi consubstantialem, et ambos unius nature et speciei condens necnon
et conformes. Quod est dicere: Adam homo sibi copulare in sponsam
non poterat nisi conformem sibi et consubstantialem imaginem sue
nature; ita et deitas homo facta per suum spiritum sibi conformans
Ecclesiam, in interiori homine nunc, in futuro autem in utroque,
tamquam consubstantialem et conformem sibi traduxit desponsando. Que
omnia operatur Deus Christus in suo proprio sancto spiritu, quo ungit
et superungit et eo tamquam suo sigillo continente ipsius essentiam se
imprimit Ecclesie sue sponse: quod est facere sue uirtutis increate.
Ubi sunt Arriomanite qui dicunt spiritum, ipsam scilicet unctionem et
sigillum Christi, continens imaginem eius naturalem - immo est ipsa
imago Christi naturalis -, creaturam esse et in nullo differre ab
aliis quos ungit et caracterizat? Erronei ipsi, delirantes etiam in
ordine nature create. Nam consimilitudinem naturalem et nature
idemptitatem sigillum cum cera et quolibet instrumento, cum formam suam
imprimit, nullam habet; sic nec unctio cum ipsis inunctis quos
inungit. Multo plus nec creator spiritus sanctus, sigillum et imago
naturalis Dei Christi ungentis ipso spiritu, habere potest cum
creatura quam inungit conformitatem nature; sed potius sicut sigillum
sui actoris continet imaginem, et unctio ungentis tenet odorem a qua
inuncti trahunt odorem suauitatis, sic et unctio Christi spiritus
sanctus ipsius Christi odoriferam et spirantem odorem beatam tenet
naturam, odore cuius diuus Paulus et omnes electi repleti clamant
dicentes: Christi odor sumus. Ita etiam et sigillum, id est idem
spiritus imago eiusdem Christi naturalis usiodos ex ipso existens,
ipsum Christum imprimit animabus sanctis Deiformandis; ad quas animas
formatas diuus Paulus, portitor sigilli, id est imaginis Christi,
spiritus scilicet sancti, clamat dicens: filioli, quos iterum
parturio donec formetur Christus in uobis, id est donec Christi
imago, ipse uidelicet spiritus, se inprimat uobis, in quo et
Christum, qui in spiritu eodem caracterizat perfecte in uobis omnem
affectum et effectum, possideatis uobis inpressum, et in ipso
Christo, id est in imagine patris uobis inpressa, ipsum patrem in
hereditatem eternam optineatis. Quoniam igitur, sicut per spiritum
sanctum habetur filius tamquam per coessentialem eidem filio - ab eo
per omnia hypostaticos et sempiternaliter existit spiritus Deus, in quo
spiritu representatur et idem, quod impossibile est fieri per creaturam
-, ita et per filium homousion patri habetur et ipse pater in
Ecclesia sancta; ergo itaque per spiritum sanctum nature diuine
participes efficimur, quod inpossibile est fieri nobis per aliquam
usiam creatam sed potius per increatam, spiritum scilicet sanctum,
consortem beate et increate et immortalis nature patris et filii. Et
ideo participes spiritus sancti, participes dicimur et Christi necnon
et Dei patris ipsum spiritum nobis dantium; et filius ad nos uenire
dicitur, ut ait filius: ad eum ueniemus et mansionem apud eum
faciemus, id est per spiritum sanctum coessentialem patri et filio
nobis datum ipsos in ipso tenemus. Et hoc est quod dicit diuus
Iohannes: in hoc scimus quoniam in eo manemus et ipse in nobis, quia
de spiritu suo dedit nobis, ac si dicat: sicut in ipso nostra sibi
unita manet natura quam de nobis assumpsit, ita et ipse manet in nobis
per suum spiritum coessentialem sibi, quem de se sua usia essentialiter
spirat et donat nobis. O ineffabilis compensatio qua iusto Dei
iudicio Arriomanite priuantur, qui spiritum sanctum negant homousion
esse filio de usia eius existentem Deum, eo quod aliquando idem de
filio senserint negantes eum homousion esse patri.
|
|
