|
Et post pauca: beatus Iohannes in epistola sua quam scribit
auctoritate et dono spiritus sancti, sicut et Euangelium ex ore Dei
filii exaltauit elidere Arrianam rabiem, ut supra dictum est, ita et
in dicta epistola auribus Ecclesie solicite intimauit, extinguendo
predictam rabiem et predicando tamquam prescius future pestis, et
filium predicando uerum Deum et ex se ueraciter sue sponse dantem
spiritum Deum. Ait enim: in hoc scimus quia in eo manemus et ipse in
nobis, quoniam de spiritu suo dedit nobis, ac si dicat: ut in sua
usia naturam nostram a nobis assumpsit et non aliunde, ita de sua usia
suum sanctum spiritum dedit nobis; ut quemadmodum in sua usia usiodos,
id est essentialiter, nostra natura empsichomeni, id est animata, est
unita et uiuit et deificatur et diuinitus prosopothen, id est
personaliter, in una persona adoratur in celo et in terra, ita et ex
illa sua essentia et non aliunde suum proprium spiritum sanctum in nos
transfundit; ut sicut in illo uiuit nostra natura deifice et ipse in
ipsa regnat, ita et nos in suo naturali spiritu simus, uiuamus et
regnemus. O ineffabilis compensatio qua iusto iudicio Dei Arriani
heretici priuati dampnantur, qui ausi sunt dicere ita filium esse in
patre et patrem in filio et spiritum amborum ita in utroque existere,
quemadmodum spiritum sanctum in nobis et nos in eodem filio per spiritum
sanctum manere; propter quod audierunt in littera, spiritu littere
priuati ab eadem littera occisi: in eo manemus et ipse in nobis; et
alibi: ut omnes unum sint (sicut) et tu, pater, in me et ego in
te; et: ut sint unum sicut et nos unum sumus, et cognoscat mundus
quia tu me misisti et dilexisti eos sicut et me dilexisti: ac si dicat
filium participatione gratie paterne et filium in patre et (patrem) in
filio existere, et non potius filium Deum naturaliter uerbum existere
in natura sapientis et loquentis patris; et spiritum uiuum et naturale
spiramen in uiua et uere spiratiua natura patris. Et quod dementius
est et maioris dampnationis, preposterantes ordinem sui erroris in quo
dicebant non filium a spiritu, ipsi inordinati, gratificari et patri
coadunari, sed potius aientes, instabiles ipsi instabilis Diaboli
imitatores, et filium gratificare spiritum et patri coadunare; nunc
autem e contrario filium a spiritu gratificari et glorificari asserunt:
quod impossibile est et blasphemum audire. Quoniam quidem sicut
impossibile est filium causam esse et genitorem sui patris, ita
impossibile est spiritum sanctum spiratum sui eterni et essentialis
spiratoris esse causam. Quidem et hoc ordo create nature in se negat
esse, et auris omnis non potest audire ut Iacob deoriginet Isaac et
Isaac generet Abraham; sed e conuerso ut rectus se habet ordo
naturalis seriei et actor nature Deus in Scriptura expressit per
Moysen sanctum, Abraham genuit Isaac et Isaac propagauit Iacob et
ex Iacob XII multiplicantur patriarche. Ita et Deus pater genuit
Deum filium, et Deus filius ex sua usia spirauit suum sanctum
spiritum; ex spiritu autem sancto in Israel XII recreantur et
gratificantur patriarche, et ad nos gentes regenerati deifice XII
mittuntur apostoli. Ait enim sanctus Moyses ut sibi Deus de medio
rubi est locutus: ego sum Deus Abraham, hoc est Deus pater
genitor, Deus Isaac, hoc est Deus filius, et Deus Iacob, id est
Deus spiritus sanctus. Non sic ergo ut asserunt alienati a gratia
Ewangelii et priuati Deo spiritu spiritus gratificat et mittit
filium, propter quod audierunt: et nunc dominus misit me et spiritus
eius: et alibi: spiritus domini super me; et in Euangelio: Ihesus
plenus spiritu sancto regressus est a Iordane; sed potius ipse filius
ex se naturaliter et coeternaliter, ut est Deus, deoriginat spirando
spiritum et non creando, et suis dilectis ipsum transmittit; et
spiritus electos per se ad filium cuius est coadunat, et filius quos
recipit per eundem spiritum per se redimit et patri cuius est
reconciliat: ut sicut spiritus est in filio sicut fluuius in fonte et
filius est in patre sicut splendor est in sole glorie per naturam, sic
per gratiam spiritus sancti electi sint in patre et filio; et nullo
modo ut aiunt Arriani sic esse spiritum in filio et utrumque in patre
quemadmodum electi per spiritum in patre et filio.
|
|
