|
Postquam determinavit Magister de divino judicio quantum ad modum
judicii et ad ministros judicis, hic determinat ea quae pertinent ad
personam judicis; et dividitur in partes duas: in prima enim parte
ostendit in qua forma Christus ad judicium veniens apparebit; in
secunda determinat de his quae judicium circumstant, ibi: et putant
quidam, dominum descensurum in vallem Josaphat in judicio. Prima
pars dividitur in duas: in prima ostendit quod Christus judicabit in
forma hominis; in secunda inducit similitudinem, scilicet quod
Christus secundum quod est homo, est causa resurrectionis corporum,
ibi: et sicut dicitur Christus secundum formam servi judicaturus
propter causam praemissam; ita etiam dicitur suscitaturus corpora
mortuorum secundum humanitatem. Prima pars dividitur in duas: in
prima determinat quod Christus in forma hominis judicabit; in secunda
quod in forma hominis gloriosa, ibi: sed cum in forma humana constet
eum appariturum, quaeritur et cetera. Et putant quidam dominum
descensurum in vallem Josaphat in judicio. Hic determinat ea quae
adventum judicis circumstant; et circa hoc duo facit: primo determinat
ea quae concomitantur judicis adventum; secundo ea quae consequuntur,
ibi: cum autem factum fuerit caelum novum et terra nova, tunc erit lux
lunae sicut lux solis. Circa primum duo facit: primo enim determinat
locum adventus; secundo effectum judicis venientis, ibi: veniente
autem ad judicium domino (...) sol et luna dicuntur obscurari.
Hic est duplex quaestio. Prima est de ipso judice. Secunda de mundi
innovatione, quae judicium sequitur. Circa primum quaeruntur
quatuor: 1 utrum Christus in forma hominis sit judicaturus; 2 utrum
in judicio apparebit in figura gloriosa; 3 utrum possit apparere in
natura divinitatis aliquibus sine gaudio; 4 de his quae adventum
judicis circumstant.
|
|
