|
Quaestiuncula 1
1. Ad quartum sic proceditur. Videtur quod Angeli in corporibus
assumptis comedere possint. Legitur enim Gen. cap. 18, quod
Abraham Angelis sibi apparentibus cibos apposuerit. Sed ipse
cognovit eos esse Angelos, quod ipsa collocutio cum eis habita
ostendit. Ergo videtur quod comedere possint.
1. Sed contra hoc est quod expressissimum argumentum dominicae
resurrectionis est ipsius Christi resurgentis comestio: unde dicitur
actuum 10, 40: dedit eum manifestum fieri non omni populo, sed
testibus praeordinatis a Deo, nobis qui manducavimus et bibimus cum
illo. Sed actus qui spiritui potest convenire, non est argumentum
corporalis resurrectionis. Ergo Angeli corpora assumentes non vere
comedunt.
Quaestiuncula 2
1. Item, videtur quod possint generare. Dicitur enim Genes. 6,
2: videntes autem filii Dei filias hominum quod essent pulchrae,
acceperunt sibi uxores ex omnibus quas elegerant; et hoc Josephus
exponit de Daemonibus incubis. Ergo videtur quod generare possint.
1. Sed contra est, quod completur generatio per virtutem formativam
quae est in semine ex corpore vivo resoluto. Sed corpus assumptum a
Daemonibus et ab Angelis, non est vivum, ut dictum est. Ergo
videtur quod generare non possint.
2. Si dicatur, quod generant per hoc quod idem Daemon succubus ad
virum, est recipiens ab eo quod postmodum in mulierem transfundit,
factus incubus ad eam; contra est, quod semen non habet virtutem
generandi nisi quamdiu calor animae in eo retinetur, quem oportet
exhalare per magnam distantiam delatum. Ergo videtur quod per istum
modum generatio fieri non possit.
3. Praeterea, si fieret generatio talis per modum istum, non esset
nisi secundum virtutem illius seminis. Ergo ex hoc non sequeretur quod
geniti essent majoris virtutis quam alii homines, ut innuitur ex his
quae sequuntur ibi, 4: isti sunt potentes a saeculo viri famosi.
Quaestiuncula 3
1. Item, videtur quod possunt sentire. Assumunt enim corpora
habentia diversa organa sensibilia. Sed hoc frustra esset, nisi per
oculos viderent et per aures audirent. Ergo et cetera.
1. Sed contra est quod sentire per organa corporalia est accipientis
cognitionem a rebus: quod Angelis non convenit, ut dictum est. Ergo
et cetera.
Quaestiuncula 4
1. Item, videtur quod possint localiter moveri, per id quod legitur
Tobiae 6, et deinceps de Angelo qui comitatus est Tobiam per multa
terrarum spatia.
1. Sed contra est, quia quod conjungitur alicui solum ut motor, si
in se sit immobile, non movetur ad motum ejus, sicut patet in
motoribus orbium, secundum philosophos. Sed Angelus, inquantum in
se est, est substantia spiritualis immobilis. Ergo videtur quod ad
motum corporis, cui sicut motor tantum conjungitur, non moveatur.
Quaestiuncula 5
1. Item, videtur quod loquantur, ex multis Scripturae locis, quae
frequenter eos hominibus locutos commemorat.
1. Sed contra est, quia in omni locutione exprimuntur quaedam
intentiones intellectae. Sed hujusmodi intentiones non possunt
pervenire de intellectu ad vocem, nisi aliquo mediante quod est
proportionatum ad hujusmodi suscipienda, sicut imaginatio humana.
Ergo videtur quod per corpus inanimatum assumptum vel per corpus brutum
loqui non possunt.
Quaestiuncula 1
Respondeo dicendum, quod, ut praedictum est, Angeli corporibus
assumptis vitam non influunt, sed tantum motum: et ideo considerandum
est, quod omnes operationes quae sequuntur corpus vivum, inquantum
vivum, non possunt Angelis in corporibus assumptis convenire; sed
tantum illae quae consequuntur corpus mobile inquantum hujusmodi, ut
movere, impellere, dividere et hujusmodi.
Ad primum ergo dicendum, quod comedere secundum completam rationem
sui, non dicit solum divisionem cibi et trajectionem in os; sed et
istum actum procedere a virtute potente digerere et convertere in
nutrimentum: et ideo Angeli non vere comederunt, sed fuit ibi vera
divisio cibi, et trajectio in corpus assumptum; qui postmodum non est
conversus in corpus illud, sed virtute Angeli aliqua dissolutus est in
praejacentem materiam. Christus autem vere comedit, quamvis cibus
conversus non fuerit: quia illa decisio cibi fuit habentis virtutem
nutritivam et conversivam. Abraham autem etsi in fine cognoverit eos
esse Angelos, non tamen est inconveniens quod hoc eum in principio
latuerit: vel si cognoverit, in alicujus mysterii commendationem eis
cibos apposuit.
Quaestiuncula 2
Ad id quod secundo quaeritur, dicunt quidam, quod Daemones in
corporibus assumptis nullo modo generare possunt; nec per filios Dei
Angelos incubos significari dicunt, sed filios Seth, et per filias
hominum eas quae de stirpe Cain descenderunt. Sed quia contrarium a
multis dicitur, et quod multis videtur non potest omnino falsum esse,
secundum philosophum, ideo potest dici, quod per eorum actum completur
generatio, inquantum semen humanum apponere possunt in loco convenienti
ad materiam proportionatam, sicut etiam semina aliarum rerum colligere
possunt ad complendum aliquos effectus, ut in praecedenti distinctione
dictum est, ut attribuatur id tantum eis quod est motus localis, non
autem ipsa generatio cujus principium non est virtus Daemonis, aut
corporis ab eo sumpti, sed virtus illius cujus semen fuit; unde et
genitus non Daemonis sed alicujus hominis filius est.
Et sic patet responsio ad primum quod contra objicitur.
Ad secundum dicendum, quod cum hic Daemones velocissime moveantur
propter victoriam virtutis moventis super rem motam, possunt aliqua
ponere ad conservationem seminis, ne calor vitalis evaporet.
Ad tertium dicendum, quod Daemones possunt scire virtutem seminis
decisi ex dispositione ejus a quo decisum est, et similiter mulierem
proportionatam ad seminis illius susceptionem, et etiam constellationem
juvantem ad effectum corporalem, scilicet optimae complexionis in
genito: quibus omnibus concurrentibus, possibile est genitos corpore
magnos esse vel fortes.
Quaestiuncula 3
Ad id quod tertio quaeritur, dicendum est, quod Angeli nullo modo
vident per oculos corporis assumpti, quia haec est operatio potentiae
corporis viventis; unde partes corporis assumpti non sunt organa
sensibilia, sed similitudinem eorum habentia ad ostendendum Angelorum
spirituales virtutes; unde Dionysius ex omnibus partibus humani
corporis docet proprietates angelicas considerare; unde non frustra
assumuntur.
Quaestiuncula 4
Ad id quod quarto quaeritur, dicendum est, quod moventur per
accidens, motis corporibus in quibus sunt: quia definitive sunt in
illis corporibus, ita quod non alibi. Deus autem non movetur ad motum
alicujus corporis: quia ita est in uno quod etiam in alio: sicut anima
non movetur per accidens ad motum manus sed ad motum totius corporis.
Similiter etiam motor orbis coniungitur orbi secundum philosophos, et
non uni parti tantum; quamvis virtus ejus primo appareat in parte
dextera unde incipit motus, et ideo non movetur per accidens, quia
totus orbis non movetur extra locum suum, nisi hoc modo quod sit in
alio loco ratione et non subjecto.
Quaestiuncula 5
Ad id quod quinto quaeritur dicendum, quod loqui proprie est per
formationem vocum ex percussione aeris respirati, determinatis
organis, ad exprimendum aliquem intellectum; et ideo locutio
corporalis Angelis convenire non potest in corporibus assumptis,
secundum completam significationem, cum non habeant vera organa
corporalia; sed est aliqua similitudo locutionis, inquantum
intelligunt, et intellectum exprimunt quibusdam sonis, qui proprie non
sunt voces sed similitudines vocum; sicut etiam quaedam animalia non
respirantia dicuntur vocare, et etiam quaedam instrumenta, ut dicit
philosophus. Intentiones autem intellectae ab Angelo efficiuntur in
illis sonis non eaedem numero sed secundum similitudinem significationis
per motus determinatos ab intellectu, sicut similitudo artis efficitur
in materia, ut domus.
|
|
