|
De secundo et quarto nulla praecepta danda erant. Contra. Lex debet
universaliter hominem de omnibus ordinare quae ad virtutes pertinent.
Praeterea, dilectio Dei similiter erat omnibus insita naturaliter.
Et dicendum, quod sicut se habent scientiae speculativae ad
cognoscenda, ita se habet lex ad operanda. Unde sicut in scientiis
speculativis non traditur doctrina de principiis per se notis, quia per
naturam cognoscuntur, sed tantum de conclusionibus quae per ea
cognoscuntur; ita neque lex determinat explicite de dilectione sui
ipsius ad quam natura inclinat, sed de dilectione proximi quae ex illa
oritur, sicut conclusiones ex principiis. Dilectio autem Dei,
quamvis nobis naturaliter insit, non tamen hoc modo quo per caritatem
diligitur, ut supra dictum est. Ex hoc autem ipso quod praecipitur
Deus diligi specialiter, docemur nos ipsos specialiter diligere.
Nemo unquam carnem suam odio habuit. Contra. Multi seipsos
interficiunt, ut dicit philosophus propter abundantem malitiam. Et
dicendum, quod vitam suam corporalem quilibet diligit naturaliter; sed
quod aliqui ad mortem suam corporalem anhelant, hoc contingit per
accidens, vel inquantum retardantur ab aliquo bono magis amato per
vitam corporalem, sicut in quaerentibus aliam vitam accidit; vel
inquantum per corporalem vitam ipsorum aliquo modo consequuntur aliqua
mala, quibus carere melius aestimant quam vitam corporalem habere.
Oritur autem hic quaestio. Videtur quod dilectio Angelorum et beatae
virginis et Christi secundum quod homo, non contineatur in dilectione
proximi, sed magis debeat reduci ad dilectionem Dei, quia supra nos
sunt. Et dicendum, quod Deus est supra nos quasi influens nobis
aeternam vitam; sic autem neque Angeli neque homo virtuosus neque
Christus secundum quod homo, supra nos sunt: quia sicut sola
Trinitas nos creavit ad vitam naturae, ita ipsa sola nos sanctificat
vita gratiae, et beatificabit vita gloriae. Sed sunt diligendi sicut
simul nobiscum participantes a Deo vitam aeternam; et in hoc juxta nos
sunt; quamvis sint supra nos in hoc quod plenius participant.
|
|
