|
Deinde considerandum est de fine sive termino productionis hominis,
prout dicitur factus ad imaginem et similitudinem Dei. Et circa hoc
quaeruntur novem. Primo, utrum in homine sit imago Dei. Secundo,
utrum imago Dei sit in irrationalibus creaturis. Tertio, utrum imago
Dei sit magis in Angelo quam in homine. Quarto, utrum imago Dei
sit in omni homine. Quinto, utrum in homine sit imago Dei per
comparationem ad essentiam, vel ad personas divinas omnes, aut unam
earum. Sexto, utrum imago Dei inveniatur in homine solum secundum
mentem. Septimo, utrum imago Dei sit in homine secundum potentias,
aut secundum habitus, aut actus. Octavo, utrum per comparationem ad
omnia obiecta. Nono, de differentia imaginis et similitudinis.
|
|
