|
Deinde considerandum est de iustitia. Circa quam quaeruntur
duodecim. Primo, quid sit iustitia. Secundo, utrum iustitia semper
sit ad alterum. Tertio, utrum sit virtus. Quarto, utrum sit in
voluntate sicut in subiecto. Quinto, utrum sit virtus generalis.
Sexto, utrum secundum quod est generalis, sit idem in essentia cum
omni virtute. Septimo, utrum sit aliqua iustitia particularis.
Octavo, utrum iustitia particularis habeat propriam materiam. Nono,
utrum sit circa passiones, vel circa operationes tantum. Decimo,
utrum medium iustitiae sit medium rei. Undecimo, utrum actus
iustitiae sit reddere unicuique quod suum est. Duodecimo, utrum
iustitia sit praecipua inter alias virtutes morales.
|
|
